Grial

A revista Grial apareceu por vez primeira en 1951, pero unha suspensión administrativa obrigouna a un silencio de máis de dez anos. Reapareceu en 1963 e desde entón non deixou nunca de publicarse. O espírito universal que lle imprimiron os seus fundadores —servir de guía responsable da actividade cultural galega e facer de ponte para a incorporación da cultura universal a Galicia— segue a ser o mesmo que preside a elaboración da revista na actualidade. Despois de todo, esta publicación leva o nome dunha fermosa lenda que é patrimonio cultural de toda Europa, pero que está tamén presente na historia e arte galegas. En Grial aparecen traballos que obedecen ao propósito duplo de informar sobre a realidade de Galicia ao tempo que se informa e reflexiona sobre os máis diversos aspectos da cultura universal.